ប្រភេទនៃការបញ្ជាទិញដែលមាននៅ CSX

ប្រភេទនៃការបញ្ជាទិញដែលមាននៅ CSX

• ការបញ្ជាទិញ៖ អតិថិជនទាមទារសាច់ប្រាក់ ឬសាច់ប្រាក់ដែលមិនទាន់សម្រេចយ៉ាងហោចណាស់ ១០០%
• ការបញ្ជាលក់៖ អតិថិជនត្រូវការមូលបត្រ ឬមូលបត្រដែលមិនទាន់សម្រេចយ៉ាងហោចណាស់ ១០០%
• វិធីសាស្រ្តបញ្ជា៖ តាមរយៈទូរស័ព្ទ អ៊ីមែល មកកាន់ការិយាល័យរបស់យើង កម្មវិធី CSX Trade ។
• រូបិយប័ណ្ណដែលប្រើប្រាស់៖ រៀលខ្មែរ (KHR)
• បញ្ជាដែនកំណត់ (Limit Order)៖ ជាបញ្ជាដែលថ្លៃបញ្ជាទិញគឺជាថ្លៃដែលហ៊ានទិញខ្ពស់បំផុត ហើយថ្លៃបញ្ជាលក់គឺជាថ្លៃដែលហ៊ានលក់ទាបបំផុត។​ ឧទាហរណ៍៖ បញ្ជាដែនកំណត់ទិញដែលមានថ្លៃ ៤.០០០រៀល អាចជួញដូរបាននៅថ្លៃ ៤.០០០រៀល ឬទាបជាងនេះ ចំណែកបញ្ជាដែនកំណត់លក់ដែលមានថ្លៃ ៤.០០០រៀល អាចជួញដូរបាននៅថ្លៃ ៤.០០០រៀល ឬខ្ពស់ជាងនេះ។​
• បញ្ជាទីផ្សារ (Market Order)៖ ជាបញ្ជាដើម្បីទិញឬលក់មូលបត្រកម្មសិទ្ធិមួយភ្លាមៗ នៅថ្លៃល្អបំផុតដែលមានក្នុងទីផ្សារ។ បញ្ជាទីផ្សារមិនត្រូវបានអនុញ្ញាតសម្រាប់ប្រតិបត្តិការផ្ដល់សន្ទនីយភាពមូលបត្រ និងការជួញដូរលើកដំបូងនៃមូលបត្រចុះបញ្ជីលក់លើកដំបូងឡើយ។ បញ្ជាទីផ្សារអាចភ្ជាប់លក្ខខណ្ឌ២គឺ លក្ខខណ្ឌជួញដូរទាំងស្រុង ឬលុបចោល និងលក្ខខណ្ឌជួញដូរ ហើយលុបចោល។ លក្ខខណ្ឌទាំងពីរនេះអាចប្រើប្រាស់បានតែក្នុងវិធីសាស្ត្រដេញថ្លៃដោយយកថ្លៃច្រើន និងនៅពេលដែលមានបញ្ជាផ្ទុយគ្នានៅផ្នែកម្ខាងទៀត។
• លក្ខខណ្ឌជួញដូរទាំងស្រុង ឬលុបចោល (Fill or Kill)៖ ជាលក្ខខណ្ឌដែលកំណត់ថាបញ្ជានឹងត្រូវលុបចោលភ្លាមៗ ប្រសិនបើបរិមាណនៃបញ្ជានោះមិនត្រូវបានផ្គូផ្គងទាំងស្រុងភ្លាមៗ
• ឧទាហរណ៍៖ បញ្ជាទិញភាគហ៊ុន ក នៃបញ្ជាទីផ្សារតាមលក្ខខណ្ឌជួញដូរទាំងស្រុង ឬលុបចោល ដែលមានបរិមាណចំនួន ២០០ អាចផ្គូផ្គងបានលុះត្រាតែបរិមាណនៃបញ្ជាលក់ម្ខាងទៀតមានចំនួនច្រើនជាង ឬស្មើ២០០។
• លក្ខខណ្ឌជួញដូរ ហើយលុបចោល (Fill and Kill)៖ ជាលក្ខខណ្ឌដែលកំណត់ថាបញ្ជានឺងត្រូវលុបចោលភ្លាមៗ ប្រសិនបើបរិមាណនៃបញ្ជានោះមិនត្រូវបានផ្គូផ្គងទាំងស្រុង ឬមួយផ្នែកភ្លាមៗ។ ក្នុងករណីដែលបរិមាណនៃបញ្ជានោះត្រូវបានផ្គូផ្គងមួយផ្នែក បញ្ជាដែលមានបរិមាណនៅសល់នោះ នឹងត្រូវលុបចោលភ្លាម។
• ឧទាហរណ៍៖ បញ្ជាទិញភាគហ៊ុន ខ នៃបញ្ជាទីផ្សារតាមលក្ខខណ្ឌជួញដូរ ហើយលុបចោល ដែលមានបរិមាណចំនួន ២០០ ត្រូវបានផ្គូផ្គងជាមួយបញ្ជាលក់នៃគ្រប់បរិមាណមូលបត្រ (ឧទាហរណ៍ ចំនួន៥០)។ បរិមាណភាគហ៊ុនដែលនៅសល់បន្ទាប់ពីការផ្គូផ្គងចំនួន ១៥០ នឹងត្រូវលុបចោលភ្លាមដោយស្វ័យប្រវត្តិ។